Nafarroako Probintzia Auzitegiak bortz urteko kartzela zigorra ezarri dio gizon bati, sexu eraso bat egitea egotzita. Mutilak 21 urte ditu, eta erasoa 2022ko irailean egin zuen, Berriozarren (Nafarroa). Epaiaren arabera, gainera, zaintzapean aske egon beharko du bertze sei urtez, ezin izanen da biktimarengana hurbildu zortzi urtez, eta 30.000 euroko kalte ordaina ordaindu beharko du.
Erasoa 2022an gertatu zen, irailaren 3ko goizaldean; biktimak lagunei deitu zien, zer gertatu zen kontatzeko: gizonak emakumea bortxatu zuen, eta felazio bat egitera behartu. Foruzaingoa deitu zuten, eta horien laguntzarekin lortu zuten erasotzailea identifikatzea: gizonarekin harremanetan jartzea lortu zuten biktimaren sare sozialen bidez.
Epaileak erran duenez, erasotzaileak «oso ongi zekien» biktimak ez zuela onetsi harremanak izatea. Emakumeak ondorio psikologikoak dituela nabarmendu dute autoan.
