Emakumeak esplotatzea eta prostituitzea egotzitako antolakunde kriminal batean parte hartzea leporatuta, bost pertsona atxilotu ditu Nafarroako Poliziaren Buruzagitza Nagusiko Atzerritarren eta Mugen Brigada Probintzialak. Iruñeko hainbat pisutan prostituitzen zituzten emakumeak.
Atxilotutako bost pertsonei lau delitu egotzi dizkiete: gizakiak salerostea sexu esplotaziorako asmoarekin, prostituzioari buruzko delituak egitea, kapitalak zuritzea eta erakunde kriminaleko kide izatea.
Atxilotuetako bat da antolakundearen burua. Bi urteko ikerketa baten ostean, Poliziek burua atxilotu zuten, eta esplotatutako emakumeak askatu. Beste lau pertsonak erregistro batean atxilotu zituzten. Iruñeko 1. Instrukzio Epaitegiaren esku utzi zituzten, eta behin-behineko espetxealdia ezarri die.
Ikerketaren arabera, atxilotuek «lan kontratu erakargarriekin» engainatzen zituzten atzerriko emakumeak Nafarroara joateko, haien baldintza zaurgarriak aprobetxatuta. Iritsitakoan, pasaportea kendu eta prostituitzera derrigortzen zituzten. Gainera, emakumeen senideei mehatxatu egiten zieten.
Ikerketaren lehen pausoa Iruñeko «prostituzio pisu» bat ikuskatzea izan zen, eta «emakumeak prostituitzera derrigortuta zeudela erakusten zuten zantzuak» aurkitu zituzten. Gero, poliziek biktima batzuk elkarrizketatu zituzten, eta biktimek zera kontatu zuten: atxilotuek «Iruñeko beste pisu batean eta Frantziako hainbat herritan» ere jarduten zutela.
Frantziako Poliziak ere parte hartu du kasuaren ikerketan. Sarearen buruak Frantzian zuen egoitza, eta, ikerketaren arabera, Nafarroara joateko arrazoi bakarra «negozioa kontrolatzea» zen. Gainera, ikertzaileek ondorioztatu dute antolakundearen buruak atzerriko kontuetara bidaltzen zuela esplotazioaren bidez lortutako dirua.
