Nafarroako Auzitegiak bost urte eta lau hilabeteko espetxe zigorra ezarri dio Iruñeko gizon bati, emazteari tratu txarrak ematea, sexu erasoak egitea eta mehatxu egitea leporatuta. 38 urte ditu gizonak. Gaur eman dute ebazpenaren berri, eta, horren arabera, egotzitako delitu guztietan aplikatu dituzte aringarriak, «erreparazioagatik» eta akusatuaren «egoera psikologikoarengatik»; jakinarazi dutenez, «nahasmendu bipolarra» dauka. Horrez gain, bederatzi urte eta bost hilabetez ezingo du biktimarekin hitz egin, ezta harengandik hirurehun metrora baino gehiagora hurbildu ere. Espetxe zigorra bete ondoren, zaintzapeko atxiloaldian egon beharko du bost urtez.
Bikotea 2016an ezkondu zen, eta 2023an banandu. Emakumeak 2024an aurkeztu zuen gizonaren aurkako salaketa. Haren arabera, elkarrekin egon ziren azken urteetan gizonak jipoitu egiten zuen, eta sexu harremanak izatera behartu.
