Jean Jacques Lasserrek piztu zuen metxa; eta Max Brissonek zabaldu du sua. Pirinio Atlantikoetako departamenduko presidenteak eta LR Errepublikanoetako senatariak ezkerreko abertzaleen kontra jo dute aste hasieran. «Gai identitarioak instrumentalizatzea», leporatu die Lasserrek, Sud Ouest egunkariari egindako adierazpenetan. Urrunago joan da Brisson, prentsari bidalitako agiri batean: «EH Bairen ideologia arriskutsua da Euskal Herrirako», adierazi du. EH Baik «zentzugabeak eta errealitatez kanpokoak» jo ditu bi hautetsien erranak.
Heldu den martxoaren 15ean eta 22an iraganen diren herriko bozei buruz mintzatu zen Lasserre Sud Ouest egunkariaren asteleheneko edizioan. «Kezka» agertu zuen, hainbat jarrera eta eskaintza politiko «gero eta muturrekoagoak» direla erranik; aipamena egin zion RN Batasuna Nazionalari, baina baita «ezkerraren ezkerrean» kokatu zuen EH Bairi ere. Besteak beste etxearekin, migrazioarekin eta laborantzarekin lotutako gaiak aipatu zituen. «Ez dira instrumentalizatu behar gai identitarioak; batzuetan populismorako joera bat izan daiteke. Identitatearen babesa ez da jarrera itxi batekin nahasi behar», erran zuen.
«Estatus bereziko kolektibitatea [Frantziako] Errepublikaren oinarriak baztertuko lituzkeen antolaketa bat litzateke, Euskal Herriak duen nortasun sakonetik biziki urrun»
JEAN JACQUES LASSERRE Departamenduko presidentea
Lasserrek «gordeka» aritzea leporatu die EH Baiko hautetsiei, eta gogor egin du estatus bereziko lurralde kolektibitatearen kontra. «Errepublikaren oinarriak baztertuko lituzkeen antolaketa bat litzateke, Euskal Herriak duen nortasun sakonetik biziki urrun».
Bide beretik, EH Bai Euskal Herriaren autodeterminazioaren alde dagoela azpimarratu du Brissonek. «Departamenduko presidentearekin batera, gure herrialdearen batasunari eraso egiten dion agenda politiko arduragabe horren kontra gaude».
«Ezker muturrekoak»
Ezezkoan da Brisson: EH Bai ez da alderdi «moderatu eta sinpatiko» bat. «Ezker muturreko mugimendu nazionalista bat da, eta araberako ideiak eta metodoak ditu». Horren frogatzat dauka Frantziako presidentetzarako hauteskundeetan EH Baiko hainbat hautetsik Philippe Poutou NPA Alderdi Antikapitalista Berriko hautagaiari babesa adierazi ziotela, hautagai izateko beharrezkoak diren bostehun auzapezen sinaduren artean haiena ere eman baitzuten. «NPAk talde kapitalista handiak desjabetu nahi ditu, estatuak etxebizitza hutsak errekisatzea nahi du, eta Polizia Nazionala desarmatzearen aldekoa da», deitoratu du Brissonek.
«EH Bai ez da alderdi moderatu eta sinpatiko bat. Ezker muturreko mugimendu nazionalista bat da, eta araberako ideiak eta metodoak ditu»
MAX BRISSON LRko senataria
Lasserreren ildo beretik, itxikeriarekin lotu ditu ezkerreko abertzaleak, euskal lurraldeari buruzko lirika betean. «Euskal Herria denena da. Haren identitatea, hizkuntza eta kultura defendatzea ez da EH Bairen jabegoa, horrek 'kanpoarekiko' borroka ideologiko batean ixten baitu, berez gure kulturak eta euskarak duten bokazio unibertsalaren kaltetan. Euskal Herriak segitu behar du harreraren, tolerantziaren, eta elkarrenganako errespetuaren lurra izaten. Atlantikora buruz diren eta gure diasporaren iturri diren arrantza portuen identitatea, Compostelako bideak hartzen dituzten eta mugaz gaindiko harreman handiei irekitako haranena, bere baitan hetsirik egotearen logikara laburbiltzen ez den historia bat. Haren historiak, kulturak eta ekonomiak berezkoa dute Frantziara, Europara eta mundura irekitzearen zigilua».
Giroa nahastea helburu
Ezkerreko abertzaleek argi dute: herriko bozetarako aste gutxi diren honetan halako adierazpenak egitearen helburua «giroa nahastea» da. «Azken urteetan, ezkerreko abertzaleek eta beren ideiek aitzinamendu garrantzitsua ezagutu dute, eta, aldiz, zentro-eskuin frantsesak eta eskuin kontserbadoreek herritar batzuen sustengua galdu dute», azaldu du EH Baik agiri batean. «Gure proposamen politikoak argiak dira, errealistak eta osoki demokratikoak. EH Baik interes orokorraren alde egiten du, Ipar Euskal Herriko biztanleen bizi baldintzak hobetzearen alde eta lurraldeak gaitasun handiagoa izan dezan politika publikoak hemen erabakitzeko».
Azken urteetan eramandako lana defendatu dute ezkerreko abertzaleek, «jendartearekin harreman zuzenean» aritu direla erranez. Ipar Euskal Herriaren aitortza instituzionala, euskara, euskal kultura, justizia soziala, etxe eskubidea edota trantsizio ekologikoaren alde egitea «demokraziaren eta herritarren bizi baldintzen alde» egitea dela baieztatu dute. «Norabide horretan proposamen politikoak egiten segituko dugu».
EH Baik erran du «elkarrizketa eta elkarlana» sustatu dituela orain arte, eta «sentsibilitate politiko ezberdinen artean Ipar Euskal Herrian eraikitako kontsentsua» laudatu du. «Interes elektoralisten eta zentzugabeko polemiken gainetik, horren alde jarraituko dugu lanean». Gainerateko eragileei dei egin die «ardura berarekin eta errespetuz» jokatzeko.
