Lantegien itxieraren mamuak hor jarraitzen duela gogoratzeko eguna da gaur. Bergarako Candy historikoaren itxieraren albistearekin batera, beste enpresa historiko baten amaieraren berri jakin da. Cablenor, AEBetako ECN Cable Group multinazionalaren Gasteizko planta itxi egingo dute, eta hango 140 langileak kaleratu egingo dituzte. Hala jakinarazi du LAB sindikatuak, zuzendaritzaren aldetik gaur bertan horren berri izan ondoren.
Erabaki gogor horrek ezustean harrapatu ditu Cablenorreko langileak, "aurretik ez delako inolako neurririk hartu". Alegia, beharginek ez zekiten enpresaren egoera txarra zenik, ez baitiete halakorik esan eta, ondorioz, ez zuten espero abendutik aurrera lanik gabe geratzea. "Ezuste izugarria izan da langileen artean", esan du LABeko ordezkari batek; "inpotentzia sentipen handia daukagu".
AEBetako multinazionalak itxiera gauzatzen badu, mende erdi bateko ibilbidea etengo da. 1959an jaio zen enpresa, Echevarria Hermanosek eta Cableria de Nortek (Cablenor) bat egin ondoren. 2006an lantegiaren geroa markatuko duen urrats erabakigarria egin zen, Grupo General Cablen sartu ondoren. Itxura batean, bere produktuak 140 herrialdetara esportatzea ez da nahikoa izango Cablenor salbatzeko.
