Nafarroako Kutxako dieten auzia Espainiako Auzitegi Gorenean aztertzearen kontra azaldu da Nafarroako fiskal nagusia, iritzita Nafarroako Kutxako Erakunde Sortzaileen Batzorde Iraunkorreko bileretan dietak kobratzean ez dagoela eroskeria deliturik. Hala ohartarazi dio gaur fiskalak Iruñeko 3. Instrukzio auzitegiari.
Fiskalak epaileari oroitarazi dio eroskeria delituaren inguruko iritzia azaldu ziola maiatzaren 20an, Enrique Maia Iruñeko alkatearen inputazioa artxibatzeko aukeraz egin zuen txostenean.
Epaitegi horretako Maria Paz Benito epaileak iritzia galdetu zien Nafarroako Kutxako dieten auziko alde guztiei, auzia Auzitegi Gorenean ikertzearen inguruan. Epaileak adierazi zuen "ezinbestekoa" zela Yolanda Barcina Nafarroako Gobernuko presidenteak inputatu gisa deklaratzea.
Barcina forudun izanik, ordea, ezin du Iruñeko epaitegiak auzipetu. Auzitegi Gorenak, ordea, epai lezake Barcina, eta horregatik galdetu zien Benitok auzia Madrilen ikertzearen inguruan.
