Collette Capdevielle sozialistak %37,70 lortu du bosgarren barrutian, eta Jean Grenet hautagaiarekiko zazpi puntuko aldearekin Legebiltzarrean aulkia hartzeko hautagai sendoa da. Jean Grenet azken bost urteetako diputatuak botoen %30 eskuratu du bozetan; 2007an, %43 eskuratu zituen.
Datorren igandean argituko da diputatu berriaren aurpegia; Grenet eta Capdeviellen artean eginen da bigarren itzulia.
Hirugarren indarra hautesbarrutian Fronte Nazionala izan da, %7,14arekin, eta horren ondotik Ezkerreko Frontea (%5,62) eta EHBai (%5,28) izan dira zerrenda bozkatuenak. Mortalena independenteak %4,15 eskuratu du, eta Amalurreko hautagaiak %3,62.
Baionan Capdeviellek 6.000 bototik gora eskuratu du, %37,9a. Grenetek, berriz, mila gutxiago, %32,9. Chantal Fronte Nazionalaren botoekin berdinduko luke emaitza UMPkoak, FNkoak mila boto eskuratu baititu, %6,69a. Lavignek botoen %5,86 eskuratu du, eta Hardouinek, %5,22. Mortalenak botoen %3,8 jaso du, eta Thebaudek, %3,41.
Angelun ere %37,59ko babesa izan du Capdeviellek, baina alde handiagorekin, Grenet %30,45ean geratu baita. Chantal izan da hirugarren (%6,93), eta EAJren sostengua zuen hautagai independentea, Mortalena, izan da laugarren (%5,36). Zentroko hautagai Veunacek %5,35aren babesa izan du, Lavignek %4,23 eta Hardouinek %4,2.
Hiriburun Capdeviellek jaso duen babesa %41,45era iritsi da. Grenet izan da bigarren hautagai bozkatuena, botoen %28,29rekin, eta horren ondotik, %7,9rekin, Hardouin EH Baiko hautagaia izan da bozkatuena. Mortalenak botoen %4,64 jaso du.
Bidaxunen botoen %37,65 jaso du hautagai sozialistak, eta Grenetek, %28,74. Chantalek %9,75 jaso du, eta Lavignek %6,89. Veunacek %5,71 boto jaso ditu, eta seigarren hautagai bozkatuena Hardouin EH Baikoa izan da, botoen %4,71rekin.
Bastidan, berriz, Grenet izan da hautagai bozkatuena, eta babes zabala lortu du orain arteko diputatuak, botoen %41,99. Capdevielle bigarren izan da, botoen %25,97rekin. Hardouin hirugarren indar politikoa izan da botoen %8,5ekin, eta horren atzetik Thebaud Amalurrekoa geratu da, %6,31rekin. Mortalenak %5,58 lortu du, eta Chantalek, %5,34.
