Ikerketako parte hartzaileek Interneten erantzun zuten galdetegia, itxialdi agindua eman eta hilabetera. Hauek galdetu zizkieten: zer egunetan jakinarazi zen itxialdia, zer eguraldi egiten zuen albistearen berri izan zutenean, zer arropa zeramaten jantzita, zertan ari ziren orduan... Era berean, inkestatuek adierazi behar zuten zenbateraino zeuden ziur erantzundako hori zehatza zela. Izan ere, horiek dira oroitzapen bat «tximista oroitzapen» izendatzeko faktore nagusiak, eta ez egiazkoa den edo ez. Horrenbestez, ez dute oroitzapenek errealitatearekin bat egiten duten edo ez frogatu behar izan.
Emaitzek argi erakutsi dute gertaera horrek oso oroitzapen zehatzak sortu dituela parte hartzaileengan, eta oroitzen duten hori zehatza delako uste handia dutela. Gainera, alarma egoera ezartzea ustekabekoa izan ote zen galdetuta, parte hartzaileen erdiek baino gehiagok adierazi zuten aurreikusteko modukoa zela COVID-19aren ondorioz alarma egoera ezartzea.
Adinak eragina du
Ikerketan kontuan hartu dute gertakaria ezustekoa izan ote zen edo ez, baina besterik ere bai; hala, aztertu dute adinak zer-nola eragiten duen oroitzapenen zehaztasunean eta oroitzapen horiek zehatzak direlako ustean edo konfiantzan. Horretarako, parte hartzaileak adin tarteka banatu dituzte: batetik, heldu gazteak (19-29 urte), bestetik helduak (30-54), eta, azkenik, adinekoak (55-78).
Erantzunak alderatuz, ondorioak argiak izan dira. Konfiantzan ez dago desberdintasunik: adina edozein dela ere, segurtasun handia dute guztiek. Zehaztasunari dagokionez, ostera, gazteenek eman dituzte xehetasun gehien. Hori lehendik ere frogatu dute beste lan batzuetan, eta, beraz, helduen arloan dago azterketaren berritasuna. Emaitzen arabera, multzo horren oroitzapenen zehaztasuna hurbilago dago adinekoen zehaztasunetik, gazteenetik baino. Orain arte, muturren arteko aldeak baino ez dira ikertu, eta erdiko taldea ez da kontuan izan. Hori da 30 eta 54 urte artekoei buruz ia daturik ez egotearen arrazoia.
Bestalde, inkestan albisteak eragindako sentipenen inguruko galdera bat zegoen, eta erantzunik baikorrenak adinekoenak izan ziren. Ez da lehen aldia frogatzen dutena gizakiek zahartu ahala positiboago izateko joera dutela, baina erakutsi dute joera horrek bere hartan eutsi diola pandemia ostean ere.
