Euskal Irratiek armagabetzeari buruz mahai ingurua antolatu dute gaur eta Jean Rene Etxegarai, Anaiz Funosas eta Agus Hernan aritu dira, besteak beste, gaur goizean Baionako herriko etxetik. BERRIAk zuzenean eman du. 7:45ean abiatu dute programa berezia Baionako herriko etxetik eta gai bakarra izan dute mahai gainean: bake prozesua. Hari horretatik tiraka hainbat alor jorratu dituzte: armagabetzea, Luhuso edota bake artisauen lana. Saio berezia zuzenean eman du BERRIAk webgunean.
Txetx Etxeberri eta Maitena Tikoiperen testigantzak jaso dituzte 2017ko apirilaren 8ko goiz hari buruz. Jarraian iraganaz eta geroaz aritu dira Mixel Berhokoirigoin bakegilearekin, Anaiz Funosas Bake Bideako kidearekin eta Foro Sozialeko kide Agus Hernanekin batera. Horietaz gain izan dira gai eta gonbidatu gehiago ere, besteak beste, Enekoitz Esnaola BERRIAko kazetari eta Luhuso. ETAren armagabetze zibilaren kontakizuna liburuaren egilea.
Ez da hori izango ordea, bake prozesuarekin lotuta asteburuan egingo den ekitaldi berezi bakarra. Izan ere, biktimak eta presoak eztabaidagai izango dituzten hiru eguneko jardunaldiak antolatu ditu Bake Bideak. Foroa gaur hasi eta igandera arte luzatuko da. Gaur, Miarritzen, Euskal presoak: Egingarritik beharrezkora izenburuko mahai ingurua egingo dute eta bertan izango dira GALen nahiz ETAren biktimen senideak. Bihar, berriz, euskal presoei buruz arituko dira, Baionan egingo den eztabaidan. Azkenik, igandean, Koldobika Jauregiren Arbolaren Egia obra estreinatuko dute Baionan bertan.
Uda aurretik
David Pla Konponbiderako ETAren ordezkaritzako kideari eta EPPKren zuzendaritzako kideetako bati elkarrizketa egin dio Sud Ouest egunkarian, eta han berretsi du, ETAk uda aurretik emango duela bere barne eztabaidaren ondorien berri. ETA Nazio Batuen erakundearen DDR protokolarekin —armagabetzea, desmobilizazioa eta bergizarteratzea— "konprometituta" dagoela esan du gainera.
Biktimei buruz galdetu diote, eta esan du, haiei ETAk "sufritu dutenei" egin dakieken ekarpenik onena "gatazka erabat gainditzea" eta "berriz ez gertatzeko bermeak jartzea" dela, "maite den pertsona baten galera ezin baita erreparatu". "Zauriak sendatzen laguntzen" saiatuko direla esan du, baina ez dutela pentsatzen ez dutenik esango "batzuk gustora uzteko helburuz".
Euskal presoen auziari buruz, Espainiako Gobernuaren jarrera salatu du, ez duelako mugimendurik egiteko asmorik agertu. Nolanahi ere, "etsiak ez hartzeko" esan die herritarrei. Madril behartzeko "nazio itun handi bat" bultzatzeko deia egin du.
Elkarrizketak "bide onean"
Bakegileen taldeko Mixel Berhokoirigoinek azpimarratu duenez, Frantziako Justizia Ministerioko arduradunekin eginiko bilerak "bide onean" doaz; bada elkar ulertze giro egoki bat, baina abiadura aldaketa behar da orain. "Presa da. Sufrimendua alde guztietan bada, denbora badoa. Ez dugu eskubiderik denbora pasatzera uzteko. Ez guk, ez Frantziako Gobernuak, ezta Espainiakoak ere". Horren harira, azaldu du, "bide onean", asteburu honetan "posible" dela albiste gehiago izatea presoei buruz.
Euskadi Irratian eginiko elkarrizketa batean esan ditu hitzok Berhokoirigoinek. Asteburu honetan eginen den bake foroan parte hartuko du. Baionako Merkataritza Ganberan gaur iluntzean izanen den saioan parte hartuko du, eta harekin batera, Pierre Massias unibertsitate irakasleak, Errenteriako alkate Julen Mendozak (EH Bildu) eta Versaillesko Gorteko epaile ohi Serge Portellik. Biktimek ere hitz eginen dute: Karmen Galdeano duela 33 urte GALek hil zuen Xabier Galdeanoren alabak eta Jexux Mari Mujika Jose Mari Korta ETAk hildako enpresaburuaren lagunak.
Bihar goizean, Miarritzeko Bellevue auditoriumean, besteak beste, presoen alorrean Frantziako Gobernuarekin zabalduriko lan esparruari buruzko bilana eginen du Euskal Elkargoko presidente Jean-Rene Etxegaraik. Elkarlan horrekin baikor azaldu da Berhokoirigoin, presoen hurbilketaz gain, uste du beste neurri batzuk ere har ditzakeela Frantziako Gobernuak: "Trantsizio garai berri batean gara. Atzoko pieza bukatzera eta pieza berri bat irekitzera doa. Pieza berriak erakusten duten seinaleak badira".
Orain urtebeteko armagabetze egunean zabaldu zuten bidean aurrera doazela azaldu du, baina zehaztu du ez dela "aurretik negoziatutako prozesu bat". "Prozesua interaktiboa da. Berak bere indarra behar du atera, urrats batek bestea ekartzeko, bestea eskatzeko. Eta horrela dira eginen egin behar diren guztiak. Ez da inori mehatxu edo exijentzia bat egin behar. Gauzak etorriko dira bakoitzak berea egiten badu, besteak eginen du berea".
Presoen auzian bezala, biktimen gaian ere urrats gehiago egin behar direla nabarmendu du, eta haiek horretan ari direla berretsi: "Guretzat ez da periferiako lan bat. Ez da presoen alde egiten dugun lana orekatzeko gaia. Elementu organiko bat da, elementu konstitutibo bat".
