Ipar Euskal Herrian debekatuta dago hondartzetan, parkeetan eta eskola inguruetan erretzea, Frantziako Gobernuak onartutako dekretua indarrean baita jada. Lehen fasean, ez dute zigor ekonomikorik ezartzea aurreikusten, baina, aurrera begira, dekretuak 135 eurotik 750era bitarteko isunak zehazten ditu debekua hausten dutenentzat.
Frantziako Gobernuak helburu gisa jarri zuen 2032rako «tabakorik gabeko belaunaldi bat» izatea, eta argudiatu dute indarrean sartu diren neurrien asmoa dela haurrak babestea. Hala, debekua adin txikikoek hartzen dituzten eremu publikoetan ere ezarriko da; besteak beste, autobus geltokiak eta kiroldegiak ere kontuan hartzen ditu. Ez, ordea, tabernetako terrazak. Gainera, ez die zigarro elektronikoei eragingo.
Catherine Vautrin Osasun ministroak eman zuen gobernuaren erabakiaren berri, maiatzean, garrantzi berezia emanik eskola inguruetan ezarritako debekuari: «Tabakoa desagertu egin behar da haurrak dauden eremuetatik». Halere, ez da bat-batean hartutako erabaki bat izan. Frantziako Osasun Ministerioak duela bi urte aurkeztu zuen Tabakoaren Kontrolerako 2023-2027ko Programa, eta orduan aurreikusi zuten gaur indarrean sartu den neurria.
Orain arte, herriko etxe bakoitzaren esku zegoen erretzeko debekuak ezartzea, baina aurrerantzean denek aplikatu beharko dute.
Eremu horietan erretzeko debekuaz gain, Frantziako Gobernuak beste zenbait neurri ere ezarri nahi ditu. Besteak beste, 2027rako tabako paketeen prezioa hamahiru eurora igotzea aurreikusten dute.
