Herriko tabernen bidez ETA finantzatzea egotzita 40 lagun daude auzipetuta 35/02 auzian. Arnaldo Otegi, Joseba Permach eta Rufi Etxeberria daude horien artean. Hamabi eta zortzi urteko espetxe zigorrak eskatzen ditu Auzitegi Nazionaleko Fiskaltzak haientzat.
2002ko apirilean abiatu zuen auzia Baltasar Garzon epaileak, eta oraindik ez da epaiketarik egin. Onartutako frogak zehaztuta, epaiketa hasteko eguna jartzea besterik ez da falta.
Bigarren zigor salak akusazioei onartu egin dizkie eskatutako froga guztiak. Ez da gauza bera gertatu defentsekin. Haiei baztertu egin dizkie froga batzuk, auziarekin loturarik ez dutela argudiatuta.
