Eusko Jaurlaritzako Euskararen Aholku Batzordeak euskararen erabilera areagotzea xede duen Euskara Sustatzeko Ekintza Plana onartu du gaur goizean egin duten bileran, Gasteizen.
Plan berriarekin orain arte indarrean zegoen Euskara Biziberritzeko Plan Nagusia "premia berrietara" egokitu nahi du Jaurlaritzak, hurrengo hamar urteetako hizkuntza plangintza "arrakastaz" gidatzeko.
Testuak jasotzen duenez, euskararen ezagutzaren eta erabileraren arteko aldea murritzeko bidean urratsa sendoak egin behar diren arren, helburua, bereziki, erabilera indartzea dela. Hala, euskararen eta hiztunen kohesioa areagotzeko ekimen eraginkorrak bultzatuz.
Plan berriak 330 ekintza proposatzen ditu, ondorengo esparruetan lantzeko: familia bidezko igorpena, irakaskuntza, euskalduntze-alfabetatzea, administrazioa, gune geografiko euskaldunak, arlo sozio-ekonomikoa, aisia eta kirola, liburugintza, kulturgintza, publizitatea, plangintza eta euskararen kalitatea, hedabideak, informazioaren eta komunikazioaren teknologiak, sentsibilizazioa eta motibazioa eta barruko eta kanpoko hedadura.
Patxi Lopez Jaurlaritzako lehendakariak adierazi duenez, "Euskararen Aholku Batzordearen esku dago aholku egokiak ematea etorkizunean hartu beharko diren norabideen eta erabakien inguruan".
Jaurlaritzak 2011n jarri zuen plana gizarteratzeko prozesua Euskararen Aholku Batzordearen eskutik.
