Ebazpena

ZIGORRAK

• Espainiako Estatua. Indarkeria matxistarekin lotuta, biktimei egia ukatzeagatik —abusuak ez aitortuz—, eta erasoetatik beren burua defendatzen duten emakumeak zigortzea sustatzeagatik. Polizien tortura eta tratu txarrak prebenitzeko, ikertzeko eta zigortzeko beharra ez betetzeagatik, eta atxilotuen inkomunikazio aldia mantentzeagatik. Etxeko langileen baldintzak modu partzial eta diskriminatorioan arautzeagatik; mendekotasun egoeran daudenak zaintzeko zerbitzu publikorik ez emateagatik; lana eta bizitza pertsonala bateratzeko legerik ez edukitzeagatik. Guatemalan giza eskubideak urratzen dituen Hidralia enpresari babes politiko, ekonomiko eta diplomatikoa emateagatik.

• Kolonbiako Estatua. Gatazka armatuaren abagunean, indarkeriarik gabe bizitzeko eskubidea ez bermatzeagatik; sexu indarkeria jasandako andreei egia, justizia eta aitortza ez emateagatik, eta krimenak ez ikertzeagatik.

• Guatemalako Estatua. Hidralia enpresa Barillas herrian jartzea baimendu eta errazteagatik, bertako komunitatearen bizimodua hondatzea eta baliabide naturalen erabilera zailtzea zekarren arren; emakume indigenen bizi baldintzak eta eskubideak ez babesteagatik, eta beren eskubideen defentsan aritutako andreak auziperatzeagatik.

• El Salvadorko Estatua. Abortua baldintza eta kasu guztietan debekatu eta zigortzeagatik, emakumeen bizitzak arriskuan jartzeagatik, eta andreen aurkako estatu indarkeria egiteagatik.

• Uvescaya enpresa (merkataritzaren alorra). Eguneroko bizimoduaz gozatzea eragozten duten lan ordutegiak ezartzeagatik; lana bizitza pertsonal eta familiarrarekin bateratzeko araudia ez betetzeagatik.

• Ecoener Hidralia-Hidro Santacruz enpresa (hidroelektrikoa). Guatemalako Barillas herria okupatzeagatik eta herritarrei beren lurrak saltzera behartzeagatik; biztanleen bizi baldintzak aldatzearen ondorioz, euren osasuna kaltetzeagatik; baliabide naturalak suntsitzeagatik; hango emakumeei jazartzeagatik.

• Euskal familia bat. Etxeko langile bat modu irregularrean kontratatzeagatik; langilea presionatzeagatik, atsedenik har ez zezan; gaixotzea eragin dion presio psikologikoa eta emozionala emateagatik; andre etorkinek jasaten duten diskriminazio askotarikoa sustatzeagatik.