Euskara ziurtagirietan aldaketa handiak iragarri ditu Eusko Jaurlaritzak. Orain arte, EGA Euskararen Gaitasun Agiria lortzeko probetara aurkez zitezkeen herritarrak euskaltegiko edo hizkuntza eskolako ikasle izan gabe. Irailetik aurrera, B1 eta B2 mailetako probak ere libreak izango dira. EGAren bakartasuna hautsiko da, horrenbestez.
Irailean izango da matrikula egiteko aukera, eta probak udazkenean egingo dituzte, HABEren azterketetako bigarren deialdiarekin batera. Ingeleseko tituluekin alderatuta, B1 maila Pet titulua da, eta B2 maila, First titulua. EGA C1 mailakoa da —ingeleseko Advanced tituluaren parekoa—.
Euskaltegietako ikasleentzat ere aldaketak izango dira. Hizkuntzen Europako Marko Bateratuari jarraituz, A1 eta A2 oinarrizko mailen curriculuma sortua du HABEk —ikasmaterialak osatzen ari dira orain—. Bi maila horiek egiaztagiriak izango dituztela jakinarazi dute. Ebaluazio jarraituaren bidez emango dituzte ziurtagiri horiek, eta eskuratzen dituzten ikasleek aukera izango dute euskara ikasteko diru laguntzetan sartzeko.
Egiaztatze sistemari dagokionez, beste aldaketa bat B1 mailako euskaltegiko ikasleentzat izango da. Azterketa orokortu bat egin beharrean, aurrerantzean probak euskaltegian bertan egingo dizkiete. HABEren asmoa da beste mailetan ere bide bera hartzea, “pixkanaka”.
