EH Bilduk herenegun aurkeztu zion Eusko Jaurlaritzari EAEko aurrekontu proiektuaren inguruko bere proposamena (220 milioi euroko balioarekin), baina gaur Maddalen Iriarte eledunak aitortu du EAJk "danbatekoa" eman diola koalizioarekin akordioa lortzeari. Salatu duenez, jeltzaleek "ateak itxi" dizkiote EH Bildurekin edozein akordio lortzeari, eta nahiago izan dute PPren eskaerei "men egitea". Hori hala, Iriartek jakinarazi du EH Bilduk osoko zuzenketa aurkeztuko diola Jaurlaritzaren aurrekontu proiektuari. "Gure hipotesi bakarra da osoko zuzenketa aurkeztea. Ez dago bestelako biderik, EAJk beste behin ere herri honen gehiengoari muzin egin diolako eta 155.aldekoekin menage à trois bat egitea erabaki duelako".
Iriarteren ustez, "herri akordio handiak" lortzeko garaia da egungoa, baina hori ezin da egin erabakitzeko eskubidea ukatu eta 155. artikulua ezartzearen alde dauden indarrekin bat eginez. Gainera, zerga erreformaren inguruan PPrekin "bi egunetan" ados jarri izana salatu du Iriartek. "Zergatik ez da posible izan azken urtebetean EH Bildurekin zerga erreforma bat adostea, eta bi egunetan PPrekin ados jartzea bai?", galdetu du.
Aurrekontuetan akordiorik posible ez bada ere, bestelako gaietan EAJri akordioetarako eskua luzatuta jarraitzen du EH Bilduk, Iriartek azpimarratu duenez.
