Ez da ustekabean hartutako erabakia izan; ELA sindikatuak mobilizazio ugari antolatu ditu gaur arte, eta sei eguneko greba abisua eman zion Matia Goxara etxez etxeko laguntza zerbitzuko enpresari. Adostasun bat lortu ondotik, gaur goizean sinatu dute bi aldeek akordioa, sindikatuak kaleratutako ohar batean esplikatu duenez.
Langileek begi onez hartu dute berria, eta «oso positibotzat» baloratu dute hitzarmena. 35 langile dira denera, eta 2026tik 2028ra bitarte izanen da indarrean. Bertzeak bertze, puntu hauek adostu dituzte, oharraren arabera: etxe batetik bertzerako desplazamendua «benetako lan denboratzat» hartuko da, soldatetan %14ko igoera izanen dute, 2025eko atzerapenak ordainduko dira, eta «hobekuntzak» eginen dituzte ordaindutako lizentzietan.
Hitzarmena adostea lortu dutela ikusita, ELAk nabarmendu du mobilizazioak eta grebak egitea «oso garrantzitsua» dela «publikoa izan behar lukeen zerbitzu pribatu bat duintzeko».
