ELA sindikatuak sei greba egunetara deitu ditu Gipuzkoako zahar etxeetako langileak, patronala hitzarmen berri baterako negoziazioak «blokeatzen» ari dela argudiatuta. 5.000 langileren «lan baldintza prekarioei aurre egiteko», greba antolatu dute ekainaren 11rako, 12rako eta 13rako, eta uztailaren 9rako, 10erako eta 11rako.
Hitzarmen sektorial berri bat adosteko beharra nabarmendu du sindikatuak, Gipuzkoako zahar etxeetako patronalek azken urteetan hartu dituzten neurriek «langileen osasunari eta zerbitzuaren kalitateari kalte egin» dietelako: «Egoitzetako arreta zuzeneko orduak murriztu dituzte, eta horrek nabarmen handitu ditu lan kargak». Gainera, sindikatuak azpimarratu du kontratu partzial «gehiegi» daudela, «langileen %40k borondatezkoak ez diren kontratu partzialak» baitituzte. Neurri horien guztien atzean zerbitzuaren pribatizazioa dagoela iritzi diote sindikatuko kideek.
Ez da lehen aldia ELAk Euskal Herriko zahar etxeetako langileen egoera salatzen duena. Azken urteetan lan baldintzek txarrera egin dutela salatu du ELAk hainbatetan, eta urtarrilean Gipuzkoako zahar etxeen patronalekin negoziazioak abiarazi zituzten hitzarmen sektorial bat lortzeko. Lau bileraren ostean, patronalek ez diete jaramonik egin ELAren eskaerei. Arrisku psikosozialen plan adostu bat, zerbitzua euskalduntzeko baliabideak eta jarduna astean 32 ordura jaistea dira, besteak beste, sindikatuaren eskaerak.
Sindikatuak, gainera, Gipuzkoako Foru Aldundiari eskatu dio esku hartzeko. Oharrean nabarmendu duenez, zerbitzuaren %90 diputazioak finantzatzen du, eta, hortaz, zahar etxeak «zerbitzu publiko» gisa hartu behar direla uste du. Horrenbestez, ELAk foru aldundiari eskatu dio neurriak hartzeko «zaintzak erdian jarriko dituen eta genero arrakala amaituko duen eredu bat ezarri ahal izateko».
