Gauerdian Elgoibarren (Gipuzkoa) izandako sute baten ondorioz, 30 bizilagun inguru atera dituzte etxetik. Eusko Jaurlaritzaren Segurtasun Sailak jakinarazi duenez, San Bartolome kaleko eraikinetako batean piztu da sua, 00:30 aldera. Dirudienez, han ez da inor bizi. Hala ere, inguruko eraikinak hustu behar izan dituzte. Ez da zauriturik izan.
Suhiltzaileek itzali dute sua, eta etxetik ateratako bizilagunetako batzuk ostatu batera eraman dituzte.
