Elkar zoriondu dute Barne ministroek

Espainiako eta Frantziako Barne ministro Jorge Fernandez Diazek eta Manuel Vallsek zorionak eman dizkiote elkarri, Aurore Martin Batasuneko kidea atxilotu eta Espainiaratu eta gero. Espainiako Barne Ministerioak ohar batean eman du horren berri. Ohar horretan zehaztu duenez, polizia operazioa Espainiaren eta Frantziaren arteko «sintonia bikainaren» emaitza izan da. Era berean, Barne Ministerioak aitortu du Batasuna legezko alderdia dela Frantzian eta Ipar Euskal Herrian, baina azaldu du ANV eta EHAKren aurkako auzian Aurore Martin atxilotzeko agindua eman zuela Auzitegi Nazionalak, Hego Euskal Herritik Iparraldera Martinen izenean zegoen kontu korronte batera dirua bidali zelakoan.