Itaiak kalera ateratzeko deia egin du emakume langileen interesen alde

Emakume langileek jasaten duten indarkeria matxistaren kontra, esplotazio ekonomikoaren kontra eta emaztekien eskubideen alde kalera ateratzeko deia egin du Itaia emakumeen antolakunde sozialistak. Emakume langileok askatzeko, batu borrokara lelopean, mobilizazioak eginen dituzte igandean Euskal Herriko bortz hiriburutan, eta bertze 22 deialdi antolatu dituzte hainbat herritan. 

Gogoratu dute Martxoaren 8a borroka eguna dela, eta hamaika arrazoi daudela hori aldarrikatzeko. Are, kritikatu dute instituzioetako alderdi politikoek, erakundeek eta enpresariek ospakizun egun bilakatu izana: «Eduki politikoz hustu, eta batasun abstraktua aldarrikatzeko baliatu baitute». 

Antolakundeak salatu du krisi ekonomikoak «milaka eta milaka emakume langileren miseria areagotu» duela, eta gehitu faxismoaren zabalpenak ideia matxistak indartu dituela, «matxismoa bera ukatuz eta emakumeen aurkako neurri zuzenak proposatuz». Emaztekien «egiturazko zapalkuntza» islatzen duten zenbait gertaera ere gaitzetsi ditu Itaiak: «Sarrigurengo erailketa matxista; polizien erasoak, Polizia Nazionalaren bigarren buruarena besteak beste; Macronen 'berrarmatze demografikorako plana'; eta abortuaren aurkakoen elkarretaratzeak». «Emakume langile askoren egunerokotasunaren parte dira indarkeria matxista, esplotazio ekonomikoa eta erabateko subordinazioa», borobildu dute.