Gorlizko Udalak (Bizkaia) urtebete eta egun batez lanik gabe utzi du sexu eraso bat egiteagatik zigortutako udaltzain bat. 2019an, erasotzaileak indarrez heldu zion mototsetik lankide bati, eta burua bere genitaletara eraman, isiltzeko esanez, epaile batek frogatutzat eman zuenez. Horretaz gain, jendaurrean biktimaren bularrei buruzko komentarioak egitea leporatu zioten. Hala ere, poliziari jar ziezaiokeen zigorrik txikiena jarri dio udalak, eta erabaki horrek sumindu egin ditu Plentziako eta Gorlizko talde feministak: «Zerbitzutik bota zezaketen, baino ez dute halakorik egin».
Zigortutako udaltzainak, gainera, aukera izango du lanera itzultzeko, urtebete eta egun bateko epea igarota. Hori guztia salatzeko, elkarretaratzea egin zuten atzo Plentziako eta Gorlizko talde feministek. Izan ere, haien ustez, «udalak ezin du ez ikusiarena egin, haren ardura baita langileen eta herritarren segurtasuna bermatzea».
Besteak beste, berdintasun plan bat martxan jartzea, langileei prestakuntza feminista ematea eta eraso matxisten kontrako protokolo argiak ezartzea eskatu diote eragile feministek udalari. Helburu horiek lortzeko, beren proposamenak aurkeztuko dituzte datorren osoko bilkuran.
