Bronkitisa, pneumonia, birikietako buxadura kronikoa, mota askotako minbiziak... Zementu fabriketan egindako errausketak 70 gaixotasun baino gehiago eragin ditzakeela salatu du 3 Mugak Batera plataformak, eta, Olatzagutiko egitasmoaren arriskuak salatzeko, gaixontasun bakoitzeko ohe bat jarri du Nafarroako Parlamentuaren aurrean, gaixo eta guzti.
Plataformako kideek Cementos Portland Valderribas lantegiko egitasmoa bertan behera uzteko galdegin diote Nafarroako instituzio publikoei, baita gizarte eragileei eta gizarteari ere. Halaber, Nafarroako Hondakinen Plana berregiteko, eta errausketa ez den beste aukeren alde egiteko eskatu du.
