Larunbat honetan Erriberara iritsi da Altsasuko gazte auzipetuekin elkartasunez Nafarroan zehar egiten ari diren martxa. Goizean, Altsasutik irten dira 80 bat herritar 20 kotxetan banatuta, eta, Erriberako hainbat herritan izan dira. Antolatzaileek jakitera eman dutenez, hango herritar ugariren babesa jaso dute eta zenbait hautetsirekin hitz egiteko aukera izan dute.
Tuteran, kalejira bat egin dute, 500 lagunek, gaiteroek eta txistulariek lagunduta, eta Foruen Enparantzan ekitaldia egin dute. Roberto Urra abeslariak egin du sarrera, eta tuterako gazte talde batek hartu du hitza, Altsasukoei elkartasuna eta babesa adierazteko.
Auzipetuen gurasoen izenean hitz egin du Edurne Goikoetxeak. Jasotako berotasun eta elkartasuna eskertu ditu, eta apirilean egitekoa den epaiketa dela-eta, kezkatuta agertu da. “Azpijokoz beteriko partida jolastera goazela badakigu, defentsarako aukerak emango ez dizkigutela badakigu”, salatu du. Ekitaldia amaitzeko, Enrike Zelaia akordeoilari altsasuarrak hainbat pieza jo ditu.
