Ertzaintza Hendaiako polizia etxean izango da bi hilabete baino lehen

Ertzaintza Baionako eta Hendaiako (Lapurdi) polizia etxeetan egoteko hitzarmena gaur sinatu dute Rodolfo Ares Eusko Jaurlaritzako Herrizaingo sailburuak eta Alfredo Perez Rubalcaba Espainiako Gobernuko Barne ministroak -biak PSOEko kideak dira-, eta Hendaiakoan bi hilabete baino lehen egongo dela jakinarazi dute.

Arratsaldeko sei eta erdietatik aurrera Erandioko (Bizkaia) ertzain etxean egin duten bileran izenpetu dute hitzarmena. Abuztuan Rubalcabak Frantziako Barne ministro Brice Hortefeuxekin hartu-emanak izan zituen horretaz.

Haiek diotenez, Ertzaintzaren egitekoen artean ez da ETAren aurkako borroka egongo. Inmigrazioa edo droga trafikoa izango ditu lan arloak, betiere iturri ofizialen arabera.

Aresek azpimarratu izan duenez, hemendik aurrera Frantziako Poliziarekin "elkarlanean" ariko da Ertzaintza Ipar Euskal Herriko zenbait polizia etxetan, Espainiako Polizia, Guardia Zibila eta CNI Espainiako zerbitzu sekretuekin batera. "Kolaborazio eta kooperazio lana" egingo dute, Herrizaingo sailburuaren arabera. "Oinarrizkoena, Ertzaintzak bere lana egin ahal izatea eta informazioa berehala partekatzeko koordinazio tresna egokiak izatea da".

EAJk, Eusko Jaurlaritzan zela -aurtengo maiatzean utzi du-, hainbat aldiz egin zion polizien elkarlan eskaera hori Espainiako Gobernuari. Baina estatuen arteko mugak zeharkatzeko baimena soilik estatuetako poliziek zutela argudiatuta -Schengengo akordioa-, Espainiako Gobernuak esaten zuen ertzainek ezin zutela Bidasoa ibaia zeharkatu eta Frantziako Errepublikan sartu.

Josu Erkoreka Kongresuko parlamentari jeltzaleak adierazi du hori erdiesteko aurretik zegoen "eragozpena" Espainiako Gobernuak jarritakoa zela, "PPkoak nahiz PSOEkoak". "Funtsik gabeko arrazoiak erabiltzen zituzten, eta faltsuak. Izan ere, bistan da: Europako legediek ahalbidetzen dute halako hitzarmenik".