Ertzaintzak gizon bat atxilotu du emakume bati autobusean sexu eraso bat egitea leporatuta. Eusko Jaurlaritzako Segurtasun Sailak jakinarazi duenez, Gasteiz eta Ermua (Bizkaia) lotzen dituen autobusean izan zen erasoa, asteazkenean. Gizonezkoa emakumearen ondoan eseri, eta ukituak egiten hasi zitzaion, harik eta ondoan zegoen beste bidaiari batek gertatutakoa ikusi eta kargu hartu zion arte.
Autobusa Arrasaten (Gipuzkoa) gelditu zenean, erasotzailea ihesi joan zen, eta gidariak Ertzaintzari deitu zion. Iluntzean atxilotu zuen Poliziak, Arrasaten bertan.
