Joan Mari Torrealdaik euskal gizarteari eskerrak eman zizkion atzo, Bilboko Euskalduna Jauregian, Euskaldunon Egunkaria osatzen zuten denen izenean. Izan ere, bost auzipetuen eta proiektu hartan parte hartu zuten guztien izenean eskerrak emateko ekitaldia egin zen atzo aipatutako lekuan, musikariak, dantzariak eta bertsolariak lagun hartuta.
Besteak beste, Jon Maia dantzaria, Maialen Lujanbio, Andoni Egaña eta Xebastian Lizaso bertsolariak, Maddalen Arzallus eta Miren Amuriza bertsolariak gitarraz lagunduta, Gose eta Katamalo taldeak, Ubeda anaiak, Aitor Gorosabel Su Ta Garreko abeslaria eta Juan Mari Beltran aritu ziren oholtza gainean.
Egunkaria-ren Babes taldekoen izenean Xabier Mendigurenek hartu zuen hitza, eta herri batzordeek ere izan zuten euren tokia -bai Euskal Herrikoek, bai Espainiakoek eta Kataluniakoek-.
Espainiako Auzitegi Nazionalak apirilaren 12an eman zuen absoluzioa. 2003ko otsailaren 20an itxi zuen Egunkaria Guardia Zibilak, auzitegi haren aginduz.
BERRIA.INFOk zuzenean eman zuen atzo ekitaldia. Berea eskumenetik kanpokoarazo tekniko batzuengatik emanaldiaren kalitatea ez zen nahi bezalakoa izan. Gaur kalitate hobeagoko bideoa jarriko du.
Webgune berezia
BERRIA.INFOk Egunkaria auzia-ri buruzko webgune berezia egin du. Esaterako, ia ehun bideo dauzka. Lehengo asteko asteartean, auzipetuen agerraldia zela-eta, ordu eta erdiko zuzeneko saio berezia eskaini zuen BERRIAren webak.
egunkaria auzia
Eskerrak eman ditu ‘Euskaldunon Egunkaria’-k
Musikariak, dantzariak zein bertsolariak aritu ziren atzo Bilboko Euskalduna Jauregiko eskertza ekitaldian. Auzipetuek biziki eskertu zuten urteotan jasotako babesa. Babes taldeko kideek eta herri batzordetakoek ere hartu zuten hitza.
Iruzkinak
Ez dago iruzkinik
Ordenatu
