Tolosaldea erreferentziako erietxe publikorik ez duen eskualde bakarra dela salatu dute gaur eguerdian Tolosan, manifestazio batean. Eskualdeko alkate guztiek eta 40 eragilek egin dute protestarako deia. Urteak dira Eusko Jaurlaritzako Osasun Sailak itun bat sinatua duela Tolosako Asuncion klinikarekin, eta hara igortzen dituzte eskualdeko herritarrak.
Kontua da Asuncion klinika ari dela gero eta indar handiagoa hartzen, osasun etxeen kaltetan. Tolosako osasun etxean ematen zituzten zenbait espezialitate ere klinikara bideratu dituzte, zerbitzu publikoa kenduta. Horrek zerbitzua kaskartzea eragin duela salatu dute manifestazioan, eta gainerako eskualdeek duten zerbitzua eskatu dute. "Ospitale publikoa nahi dugu. Ez da demagogia kontu bat".
Ehunka lagunek egin dute protesta Osasun eskubidea. Publikoa eta kalitatezkoa leloa zeraman kartel baten atzean. Eskualdeko alkateak joan dira martxaren buruan. Atzetik, herritarrak; asko, adinekoak. Tolosaldekoa "esperimentu bat" dela ohartarazi dute, Jaurlaritzak ildo bera har dezakeela beste eskualde batzuetan.
