«Mutil edo neska batek arbela ikustea ezin da egon haren familiaren diruaren mende», esan du Pedro Sanchez Espainiako Gobernuko presidenteak, neurria azaltzean. Hego Euskal Herriko 16 urtetik beherako haur eta gazteek betaurrekoak edo lentillak behar badituzte, Espainiako Gobernuak kostuaren zati bat ordainduko die irailetik aurrera, ehun euro gehienez. Errege dekretu baten bidez onartuko dute neurria, eta ikasturtea hasi aurretik jarri nahi dute indarrean.
Espainiako Optikoen eta Optometristen Elkargoak kudeatuko du laguntza. 48 milioi euro izango dira guztira. Laguntza unibertsala izango da, haur eta gazte guztiek jaso ahal izango dute, haien familiaren errenta edozein izanda ere. «Ondo ikusteko eskubidea» abiatu dutela esan du Monica Garcia Osasun ministroak. Sanchezen arabera, eskola porrotaren kasuen %30ek lotura dute ikusmen arazoekin.
