Espainiako Poliziako inspektore bat atxilotu zuten joan den asteazkenean Iruñean, lankide bati sexu erasoa eta jazarpena egitea egotzita. Emaztekiak salaketa bat jarri zion atxilotuari, ukituak eta jazarpen sexuala egitea egotzita. Iruñeko Instrukzio Epaitegiaren esku dago kasua: herenegun deklaratzera deitu zuten gizona, baina ez zituen galderak erantzun, eta epaileak behin-behinean aske uztea erabaki zuen, emakumearengandik urruntze agindua ezarrita. Halaber, harekin harremanetan jartzea debekatu diote, eta arma baimena kendu.
Atxilotuak hamabortz urte zeramatzan Nafarroan lanean, baina salaketaren berri izatean Espainiarat lekualdatzeko eskatu zuen, eta egun han dago lanean.
Espetxeratu bat
Foruzaingoak jakinarazi du gizon bat espetxeratu dutela haren bikotekide ohiarengandik zuen urruntze agindua urratzeagatik; baita poliziari eraso egiteagatik ere.
Horrez gain, bertze sei gizon atxilotu ditu Foruzaingoak aste honetan, guztiak indarkeria matxista egotzita.
