Iñigo Urkullu Eusko Jaurlaritzako lehendakaria eta Artur Mas Kataluniako Gobernuko presidentea batzartu eta biharamunera, bilera egin dute EAJko presidente Andoni Ortuzarrek eta Josep Rull CDCko koordinatzaileak.
Artur Mas, Irene Rigau eta Joana Ortega Kataluniako Gobernuko presidente, Hezkuntza Kontseilari eta presidenteordeari elkartasuna helarazteko eskatu dio Ortuzarrek Rulli: "Herriari hitza ematea inoiz ezin da izan norbait akusatuen aulkian esertzeko argudioa".
Ortuzarrek eta Rullek azaldu dute "Euskadiren eta Kataluniaren gatazka nazionalen irtenbidea bi gizarteek euren etorkizunaz erabakitzeko eskubidearen aitortzaren eskutik" helduko dela. EAJk planteatu nahi duen estatus politiko aldaketa azaldu dio Ortuzarrek; ildo horretatik, azaldu dio "lehen ebaluazio fase batean" dagoela Eusko Legebiltzarreko autogobernu landaldea, eta 2015ean zehar "proposamen fase berri bat" zabalduko dela.
Biek beren egin dituzte "puntuz puntu" Masek eta Urkulluk igandean eginiko hausnarketak, eta kezka azaldu dute Espainiak duen "estatu ereduaren krisi instituzionalaren" aurrean. Gainera, Madril "estrategia birzentralizatzailea" garatzen ari delakoan ere kezkatuta agertu dira, jarrera horrekin Espainiako Gobernuak "aldebakartasunez" hausten baititu "duela hiru hamarkada lortutako adostasun politikoak".
