Del Rio aske uzteko eta kalte-ordainetan 30.000 euro emateko agindu zuen Giza Eskubideen Europako Auzitegiak uztailaren 11n, baina Espainiako Gobernuak ez zuen ebazpena bete, eta helegitea aurkeztu zuen joan den urriaren 4an.
Hain zuzen, Madrilen helegitea onartu edo baztertu aztertuko du Estrasburgok martxoaren 20an, 09:15etan. Auzitegiaren hirugarren aretoak eman zuen ebazpena uztailean, eta orain organo gorenak hartu beharko du erabakia.
Del Rio 2008an zen libre ateratzekoa, baina 192/2006 doktrina —Parot doktrina— ezarri eta 2017ra arte luzatu zioten zigorra. Neurri hori ez zitzaiola ezarri behar ebatzi zuen Estrasburgok.
Epaia behin-behinekoa dela argudiatuta, Espainiako auzitegiek entzungor egin diote Estrasburgoren ebazpenari. Ez zuten Del Rio aske utzi, eta Parot doktrina ezartzearen aurkako 24 helegite baztertu zituen Auzitegi Nazionalak joan den ostiralean; tartean, Del Riorena.
