Immigrazioa

Etorkinei buruzko ikerketaren datuak kaleratzea kritikatu du Euskal Herriko Marokoarren Elkarteak, "Marokoarren aurkako arbuioa handitzen duelako"

AZRAF Euskal Herriko Marokoarren elkarteak gogor salatu du Eusko Jaurlaritzak etorkinei buruzko ikerketaren emaitzak kaleratu izana. "Etorkinei buruz Eusko Jaurlaritzak egindako ikerketaren emaitzak kaleratzeak marokoarren aurkako arbuioa handitzea ekarriko du". Erakundeko bozeramaile Khalid Amzirrek adierazi duenez, "komenigarria da immigrazioari buruzko ikerketak egitea. Hala ere, euskal gizarteak hainbat nazioetako herritarren aurka agertzen duen mespresua azaltzean, jendearengan ikara sortzen duzu. Edozein ikerketaren helburua informazioa ematea da, ez jendea ikaratzea".

2005eko urtarrilaren 13a

16:50

Entzun 00:00:00 00:00:00

Iragan astelehenean Eusko Jaurlaritzako Gizarte Gaietarako sailburu Javier Madrazok Immigrazioaren Euskal Behatokiak egindako inkesta aurkeztu zuen. Inkestaren helburua Arabako, Gipuzkoako eta Bizkaiko herritarrek etorkinei buruz duten iritzia ezagutzea zela adierazi zuen Madrazok. Amzirrek oraindik ez dutela inkesta jaso aitortu du. Hala ere, komunikabideen lana kritikatu du, "soilik ikerketaren daturik ezkorrenak" argitaratu dutelako.

Euskal Herrian bizi diren Marokoarrek "multzo heterogeneoa" osatzen dutela dio Amzirrek. "Jakina da Marokoko eta Euskal Herriko kulturen artean ezberdintasun ugari daudela. Hala ere, guk aurreiritzi eta estereotipo ugariri aurre egin behar diegu. Astelehenean Jaurlaritzak aurkeztutako inkestak soilik aurreiritzi eta estereotipo horien ugaritzea ekarriko du":

Aukeratu BERRIA gogoko iturri gisa Googlen. Aktibatu hemen

Iruzkinak

Ez dago iruzkinik

Ordenatu

Gehien irakurriak