Espainiako Gobernuak EH Bildurekin eta ERC Esquerra Republicanarekin adostu duen Etxebizitza Lege proiektua bozkatzekoak dira gaur Espainiako Diputatuen Kongresuan, eta, atzo, Euskal Herriko Kontseilu Sozialistetako etxebizitza sindikatuek elkarretaratze bat egin zuten Bilbon, lege proiektu hori «hauteskunde fartsa bat» dela salatzeko. Jabe handien eta errentari txikien «neurrira» egindako legea dela adierazi dute, eta haien irabaziak «bermatuko» dituela.
«Ez dio benetako konponbiderik ematen etxegabetzeen arazoari, etxebizitzak negozio iturri izaten jarraituko duela bermatzen baitu», erantsi dute etxebizitza sindikatuek. Nabarmendu dute lege horrek ez diela etxebizitzarako sarbidean «aurrerapauso errealik» ekarriko langileei.
Atzoko elkarretaratzean, Euskal Herriko Etxebizitza Sindikatu Sozialista sortuko dutela ere iragarri zuten. Ekainaren 10ean egingo dute aurkezpena.