Etxejabe handiek Nafarroan dituzten jabetzak aitortu ditzakete dagoeneko, eta irailaren 11 bitarteko epea dute horretarako. Etxebizitza, Gazteria eta Migrazio Politiketako sailburu Begoña Alfarok eman du horren berri, Elga Molina Nafarroako Gobernuko Etxebizitza zuzendari nagusiarekin batera egindako agerraldian. Adierazi dutenez, neurri horren bidez indarrean dagoen etxebizitza araudia betetzen da: «Nafarroako etxebizitza arloaren kudeaketa gardenagoa eta eraginkorragoa».
Honako hauek hartzen dira etxejabe handitzat: bizitoki gisa erabiltzen diren hamar etxebizitza baino gehiago dituzten pertsona fisiko eta juridikoak —garaje eta trastelekuak kontuan izan gabe—; 1.500 metro karratu baino gehiagoko eremu eraikiak dituztenak; eta Nafarroako tentsio handiko eremuetan bortz etxebizitza edo gehiago dituztenak. Talde horietan daudenek ez badute erregistroa betetzen, 30.000 euro bitarteko isuna jaso dezakete.
Alfarok erran duenez, erregistro horren bitartez merkatuari «gardentasuna» emanen zaio: «Etxebizitza funts handien gaineko kontrola ahalbidetuko du, haiek etxebizitzak nola kudeatzen dituzten eta araudia eta beren ardurak betetzen dituzten ikusi ahal izateko. Arreta berezia jarriko da talde zaurgarrien eskubideak babestean».
Erregistroa
Etxejabe handiek Nafarroako Gobernuaren webgunearen bitartez egiten ahal dute erregistroa. Bertzeak bertze, honako informazio hau zehaztu beharko dute: jabetza bakoitzaren helbidea, katastroko erreferentzia, etxebizitzaren erabilerari buruzko informazioa eta kontserbazio egoera. Gainera, pertsona juridikoek zehaztu beharko dute nork kudeatzen duen jabetza hori.
Erregistroan edozein aldaketa egiteko hilabete bateko epea izanen dute.
