Gipuzkoan 4.875 pertsonak jaso zuten zerbitzua 2013an, baina 6.146k 2007an. Azaldu dutenez, prezioa, malgutasun maila eta sektoreko merkatu beltzaren lehiakortasuna izan dira beherakadaren eragile nagusiak.
Horri aurre egiteko, berrordainketa merkatzearekin batera, zerbitzuaren ordu kopurua handitu beharko dute, hala behar dutenentzat. Bestetik, baztertze arriskuan dauden gazteei eta zaintza beharrak dituzten beste herritarrei arta zerbitzua zabaltzearen alde azaldu dira.
Langileen egoera hobetzeko beharra ere badagoela uste dute Ander Rodriguez Gizarte Politikako diputatuak eta Iker Uson Deustuko Unibertsitateko irakasleak. Sektoreko langileek lan hitzarmen kolektiboa behar dute; izan ere, ez dute haien lan baldintzak erregulatzen dituen itunik.
Ikerketan jasotako ondorioei aurre egiteko etorkizunean probarako egitasmoak abiatu beharko direla azaldu dute, proposatutako neurrien eraginkortasuna frogatzeko. Horretarako beharrezkotzat jo dute etxeko zerbitzuaren ikuspegiari, edukiari eta finantzaketari buruzko erakundeen arteko akordio berria adostea. Udal zerbitzua bada ere, egun, Gipuzkoako Aldundiak zerbitzuaren %70 finantzatzen du.