Etzi aztertuko dute Haranbururen kargugabetzea

Joan den ostiralean, Imanol Haranburu Hizkuntza Eskolen buru izendatu zuen Hezkuntza Departamentuak, baina atzera egin zuen UPNk ETAko kide ohia dela salatu eta gero. EH Bilduko Adolfo Araizen ustez, erabakia «larria» da, «zigorrak bete dituen inori ezin zaizkiolako eskubideak mugatu». Araizen ustez, Haranburu prestatua zegoen postu administratibo hori izateko, eta «gainerako analisi politikoak egiteak sorgin ehiza irekitzea dakar». Geroa Bai ez zen bat etorri analisi horrekin, baina etzi aztertuko dute gaia akordioaren jarraipen batzordean.