«Prest izanen ginela iragarri genuen, eta prest izanen gara». Pozik agertu da Jean Rene Etxegarai, elkargo bakarra prestatzeko gidaritza batzordeko presidentea, gaur egungo hamar herri elkargoetako presidenteek inguratua. Urtarrilaren 23an eginen dute Euskal Elkargoko lehen asanblea bilkura. Irail hasieran prestaketa lanekin hasi zirenean, inor gutxik erranen zuen desadostasun guziak gainditzeko gai izanen zirela, baina, agindu bezala, urtea bukatu aitzin aurkeztu diote prentsari elkargoa zuzenduko duen gobernantza paktua.
Hiru gune nagusi izanen ditu erakundeak: 233 kideko elkargo kontseilua, 69 kideko batzorde iraunkorra eta 25 kideko batzorde eragilea. Ondoan, oraingo hamar herri elkargoen eremuko lurralde poloak izanen dituzte, «hurbileko zerbitzua bermatzeko», eta eskumenen araberako sindikatuak. Bi aholku batzorde ere izanen dira. Alde batetik Auzapezen Biltzarra, eta Garapen Kontseilua, gizarte zibileko eragileek ere beren hitza izan dezaten.
Eskumenei dagokienez, zehaztapenak eman dituzte. Euskaltzaindiak eta Euskal Konfederazioak eskatu bezala, Euskal Elkargoak hasieratik hartuko du hizkuntza eta kultura politikaren eskumena. Horrekin batera, hamar herri elkargoek orain arte zituzten eskumenak ere izanen ditu; besteren artean, garapen ekonomikoa, lurralde antolaketa, ingurumena eta etxebizitza. Bi urteko epean, eskumen horiek elkargo mailan atxiki ala herriei itzuli erabaki beharko du. Herriei itzultzen zaizkien eskumenak kudeatzeko, sindikatu gehiago sortu beharko dituzte.
Gidaritza batzordean parte hartzen duten hautetsiek gobernantza paktuaren aldeko adostasuna lortu badute ere, urtarrilaren 23ko asanblean bozka bidez berretsi beharko dute elkargo kontseiluko kideek. Egun horretan hautatu beharko dute Euskal Elkargoko presidentea ere. Jean Rene Etxegarai izanen dela ebidentzia bat bezala agertzen bada ere, Baionako auzapezak ez du baieztatu nahi izan hautagai gisa aurkeztuko denik.
Hirugarren helegitea
Elkargo bakarraren kontrakoek ez dute bataila galdutzat eman nahi. Pirinio Atlantikoetako prefetaren azken ebazpenari helegitea jarri diote. «Badakit Emmanuel Alzurik -Bidarteko (Lapurdi) auzapeza elkargoaren kontrakoen elkartea utzi duela, baina ez dakit nor dagoen helegite honen atzean», argitu du Etxegaraik. Notre legea bera zalantzan jartzen dute kontrakoek, eta Paueko Administrazio epaitegian helegitea jartzearekin batera, lehentasunezko konstituzionaltasun galde bat egin dute. «Lege horrek adierazitakoa hitzez hitz bete dugu, ez dugu kezkatzerik», erran du Etxegaraik.
Euskal Elkargoak urtarrilaren 23an eginen du lehen bilkura, Baionan
Gobernantza eta fiskalitate paktuak onartu dituzte jadaneko. Elkargoaren kontrakoek hirugarren helegitea jarri dute
![Euskal Elkargoa prestatzeko gidaritza batzordeko kideak, atzo, Baionan. ISABELLE MIQUELESTORENA. Euskal Elkargoa prestatzeko gidaritza batzordeko kideak, atzo, Baionan. ISABELLE MIQUELESTORENA.](https://www.berria.eus/uploads/s1/57/27/22/p005-f01.jpeg)
Iruzkinak
Ez dago iruzkinik
Ordenatu