Baserritar jantzitako pertsonaiak sortu dituzte emozioen berri emateko, jaien inguruko emotikonoak sortu dituzte, sinbolo tradizionalak, futbol taldeak... Sei gai desberdinetan sailkatuta, 60 emotikono baino gehiago bildu dituzte, eta haiek guztiak norbere telefonora deskargatzeko moduan daude jada Android eta iOS plataformetan.
San Fermin, Zeledon, Marijaia, Olentzero, Donostiako Danborrada, pintxoa, taloa, karolina, kalimotxoa, ikurrina, eguzkilorea, lauburua, sirimiria, dantzariak... Irudiak ez ezik, euskal adierazpen batzuk ere bildu dituzte: "zorionak", "aiba la ostia", "kaben zotz"...
Bilboko lau gaztek garatu dute proiektua. Gaur azaldu dutenez, Roberto Garridok iOS gailuentzako garapena egin du, eta Ivan Petrelek Androiden garapena. Bilboko Tellmewow enpresarekin elkarlanean aritu dira. "Gaur egun, jendea sare sozialetako emotikonoak erabiltzen ohitu da", adierazi du Isabel Liebana Tellmewoweko bazkide eta zuzendariak. "Horregatik, Euskal Herrian dugun tradizio, ikono eta hurbiltasun hori islatzeko emotikono hauek behar genituen".