Santanderko (Kantabria, Espainia) kostaldeko El Bocal izeneko eremuko egurrezko pasabide bat hautsi egin zen atzo arratsaldean, eta bost pertsona hil ziren, pasabidetik erorita. Horietako hiru euskal herritarrak dira, Espainiako Gobernuak Kantabrian duen ordezkaritzak baieztatu duenez: Barakaldoko (Bizkaia) 21 urteko bi neska eta Balmasedako (Bizkaia) 21 urteko mutil bat. Elvillarreko (Araba) 19 urteko neska bat zaurituta dago. Gainerako hildakoak Espainiako bi neska dira, 20 eta 22 urtekoak. Litekeena da beste bat ere hil izana ezbeharrean, 20 urteko neska espainiar bat desagertuta baitago oraindik.
Pasabideak kostaldeko bi lur zati lotzen ditu. Zazpi gazteak El Bocal eta Espainiako Ozeanografia Institutuaren arteko ibilbidea egiten ari zen. Egurrezko pasabidea puskatu eta gero, haren gainean zeuden gazteak arroketara eta itsasora erori ziren. Larrialdi zerbitzuek 16:45 aldera jaso zuten istripuaren berri. Suhiltzaileak, itsas salbamendua, helikoptero bat, anbulantziak eta poliziak joan ziren bertara. Lau neskak aurkitu zituzten aurrena; 20:00ak aldera topatu zuten Balmasedako mutila. Nesketako batek zauri larriak zituen eta Valdecillako ospitalera eraman zuten. Bertan hil zen.
Bizirik dagoen bakarra Elvillarreko 19 urteko neska bat da. Hark eskatu zien laguntza inguruan ziren bi txirrindulariri, eta haiek deitu zuten larrialdi zerbitzuetara. El Bocal inguruan bertan artatu zuten aurrena, hipotermia zantzuak zituelako. Valdecillako ospitaleko ZIU zainketa intentsiboetako unitatean dago, Santanderren. Haren egoera egonkorra da eta hiltzeko arriskutik kanpo dago.
Lanbide Heziketako ikasleak
Zazpi gazteak Kantabriako Medio Cudeyo herriko La Granja de Heras Lanbide Heziketa zentroko ikasleak ziren. Nekazaritzan, abeltzaintzan eta basogintzan espezializatutako ikastetxea da. 500 ikasle eta 70 irakasle baino gehiago ditu. Gurutze Gorriko laguntza psikosozialerako talde bat ari da ikaskideak eta irakasleak artatzen.
Desagertuta dagoen neska bilatu nahian ari dira goizetik. Minutu bateko isilunea egin dute eguerdian Santanderko udaletxearen aurrean. Espainiako Polizia ari da arduratzen ikerketaz, istripua gertatu zenean guardian zegoen epaileak hala aginduta.
Epaileak onartu du jada identifikatuta dauden hildakoen gorpuak senideei ematea. Gaur arratsaldean emango dizkietela espero dute, Gema Igual Santanderko alkateak zehaztu duenez. «Biktimen momentu da», alkatearen iritziz.
Jaurlaritza, familiekin harremanetan
Bingen Zupiria Eusko Jaurlaritzako Segurtasun sailburuak jakinarazi du familiekin harremanetan daudela, laguntza eskaintzeko. «Jaurlaritzaren izenean gure atsekabea eta dolumina adierazi nahi diegu», esan du Zupiriak.
