Gasteizko euskara plana

Euskara Planaren komunikazio kanpainatik kanpo utzi du BERRIA Gasteizko Udalak

Gasteizko Udalak Euskara Planaren komunikazio kanpainatik atera du BERRIA, publizitatea kontratatu ostean. Hango Udalarentzat lan egiten duen publizitate agentzia batek BERRIAn 1.500 euroko publizitatea jartzeko kontratua egin zuen, baina, egun batetik bestera, kontratua atzera bota zuten. Gaur, Alfredo Iturricha PPren zinegotziak komunikazio kanpaina aurkezteko prentsaurreko eman du, eta BERRIAko kazetariak egin dizkion galderei erantzunez esan du, beraien irizpidea "zabalkunde handiko komunikabideetan" iragarkiak jartzea izan dela, eta gainera, ukatu egin du, BERRIArekin kontratua sinatu eta gero atzera egin zutenik.

2005eko ekainaren 15a

17:22

Entzun 00:00:00 00:00:00

BERRIAko kazetariak "zabalkunde handiko komunikabide horiek" zein diren galdetu dio orduan, baina Iturrichak ez dio erantzun, informazio hori ez zuela argudiatuta. Kanpainatik kanpo utzi dituzten komunikabideak BERRIA eta 'Gara' dira.

Bestalde, Gasteizko Udaleko gainerako taldeek —EAJ, PSE-EE, EB-Berdeak, eta EA— Iturricharen agerraldia eskatu dute. Izan ere, euskara gaietan adostasunarekin jokatu behar zutela erabaki zuten Udalean, baina, diotenez, "Iturrichak bere kasa" erabaki du komunikazio kanpaina hau nola egin. Beraz, azalpenak emateko eskatu diote.

Euskara plana iazko urte amaieran onartu zuten, eta oraintxe jarri da martxan. Gertatutakoak planari ez al dion kalterik egin galdetu dio kazetariak Iturrichari, eta hark, ezetz erantzun dio, besterik gabe.

Kanpainak 30.000 euroko aurrekontua du, eta bihar hasi, eta hilabetez luzatuko da. Egunkarietan eta autobusetan publizitatea jarriko dute, eta tamaina errealeko bost panpina aterako dituzte kalera.

Aukeratu BERRIA gogoko iturri gisa Googlen. Aktibatu hemen

Iruzkinak

Ez dago iruzkinik

Ordenatu

Gehien irakurriak