"Euskara elkargune, lokarri, zoru komun bihurtu behar dugu. Blindatu beharra daukagu". Hitz horiek esanaz jaso du Kike Amonarriz soziolinguistak Anton Abadia saria, Gipuzkoako Aldundiak emanda, diputazioaren egoitzan eginiko ekitaldi batean. Euskarak "arnasgune politikoa" behar duela nabarmendu du, eta gogoan izan ditu Inaxio Agirre, Axun Aierbe eta Fernando Muniozguren.
Gipuzkoako ahaldun nagusi Markel Olanok, berriz, "erakunde publikoen eta euskalgintzaren arteko elkarlana indartzeko" konpromisoa hartu du, euskararen aldeko akordio "nazional bat" defendatzearekin batera. Halaber, euskara "eztabaida politikotik kanpo" uzteko beharra azpimarratu du.
