Euskarak bizi duen larrialdiaren aitzinean, Euskal Hirigune Elkargoak hizkuntza politikan zinezko jauzi bat egin dezala eskatu du EHE Euskal Herrian Euskaraz-ek Baionan. Bilkura egin dute, eguerdian, Jean Rene Etxegarai Euskal Hirigune Elkargoko lehendakariarekin eta Antton Kurutxarri hizkuntza politikarako lehendakariordearekin. Euskarak egunerokoan pairatzen dituen bidegabekeriak salatzeko eskatu diete.
Bilkuraren ondotik egindako agerraldian, azken hilabeteetan izandako gertakariak oroitarazi dituzte, euskarari eta euskaldunei ezartzen zaizkien debekuak azpimarratzeko: auzitegietan euskaraz mintzatzeko debekua, ikasleek azterketak euskaraz pasatzeko debekua, eta herrien euskal izenak ofizialak ez izatea.
Horrez gain, kultur arloan euskal kulturari lehentasuna emateko eskatu diote elkargoari EHEko kideek, eta baita euskara ikasi nahi duten heldu guziek euskarazko kurtsoak kitorik hartu ahal izateko baldintzak sortzeko ere.
