PPko buruzagiak aurreratu zuenez, bere alderdiak «Estatutuan, Konstituzioan, askatasunen defentsan eta terrorismoaren porrotean» oinarrituriko aldaketaren alde egingo du. Patxi Lopez PSE-EEren lehendakarigaiari babesa emateko aukeraz hurrengo egunetan hitz egingo dutela azaldu zuen, eta Mariano Raxoi PPren presidentea emaitzekin oso pozik dagoela adierazi zuen. «Badaki zein den EAEko PPk jokatu behar izango duen rola», gaineratu zuen.
Raxoik berak baieztatu zuen, Madrildik, aldaketa bultzatuko dutela. «Hauteskundeen aurretik defenditzen genuena jarraitzen dugu defenditzen: aldaketaren beharra».
Basagoitik «historikotzat» jo zuen atzoko eguna, «lehen aldiz ETAren botopaperak ez baitira Eusko Legebiltzarrean izango, eta ETAren marka edo zerrendetako bat bera ere ezin izan da aurkeztu».
PPren «porrota» iragartzen zuten inkesta guztiak agerian geratu direla eta «bidean aurkitutako oztopo eta zailtasunak» gainditzea lortu dutela adierazi zuen Basagoitik, alboan Iñaki Oiartzabal zuela. «Bipolarizazioa eta boto baliagarriaren aldeko deiak gainditzea lortu dugu. Gure helburuak lortu ditugu», ziurtatu zuen.
Rodrigo Rato, eskudun
Rodrigo Rato Espainiako Gobernuko presidenteorde ohi eta Ekonomia ministro ohiak PPren eskudun gisa parte-hartu zuen atzo. Egunean zehar, hainbat hautesleku bisitatu zituen Ratok, horien artean Donostiako Gros auzoko ikastetxe batean jarritako bat. Maria Jose Usandizaga Gipuzkoako PPren presidenteak eta Arantza Quiroga Gipuzkoako zerrendaburuak lagundu zioten. Ikastetxean sartzen ari ziren unean, gazte batek independentzia eta demokraziaren aldeko oihuak egin zituen, eta beste bi gaztek D3Mren botopaperak erakutsi zituzten hauteslekuaren barruan.
