1938an Ezkabako (Nafarroa) presondegitik ihes egindako —eta gerora, fusilatuak izandako— presoak omendu zituzten atzo goizean. Ahaztuak elkarteak eta Berriozarko Udalak antolatu zuten, eta bi monolito jarri zituzten Ezkaba mendiko magalean, fusilamenduak izandako tokietan. Dozenaka pertsonak bat egin zuten, eta goizeko hamaiketan abiatu ziren martxan, Berriozarko Alde Zaharretik. Monolitoak jartzearekin batera, lore eskaintza egin eta aurreskua ere dantzatu zuten, bertan hildakoen omenez. Xabier Lasa Berriozarko alkatea ere egon zen ekitaldian.
1938ko maiatzaren 22an izandako ihesaldian 795 presok ihes egin zuten Ezkaba mendiko presondegitik, Iruñe ondoan. Horietatik, ordea, hiruk bakarrik lortu zuten Ipar Euskal Herriko muga zeharkatzea. Gainerakoak atxilotuak edo mendian bertan fusilatuak izan ziren.
