«Euskararen munduetan barna» murgiltzeko aukera ematera doaz aurten ere Plazara, AEK, Uda Leku, Dindaia eta Ebete elkarteak: familiei egokitutako Famili'On egonaldi ibiltariak egin zituzten lehen aldiz iaz, eta esperientzia berritzera doaz orain. Gaur goizean aurkeztu dituzte, Baionan, aurten proposatuko dituzten hiru egonaldi bereziak. Helburua argia izanen da guztietan: «Parte hartzaileen euskara maila hobetzea eta familien hizkuntza ohiturak aldatzea».
Aurten, berriro, ibiltariak izanen dira egonaldiak, eta hiru proposamen egin dituzte, iaz baino bat gehiago, gurasoen hizkuntza mailaren arabera egokiturik. Uda Leku elkartearen koordinatzaile Maddi Bordagarai mintzatu da egonaldien ezaugarrien inguruan: «Lehen bi egonaldietan helduen euskalduntzea izanen da helburuetako bat: euskara eskolak izanen dituzte goizean, eta, denbora berean, haurrak Uda Lekurekin jostatuko dira. Arratsaldean, familiak berriz bilduko dira, eta bisitak eginen ditugu denek elkarrekin». Bi egonaldiak apirilean iraganen dira, eta aste banakoak izanen dira; aldiro, astea bitan zatitua izanen da, lehen partea Ipar Euskal Herrian iraganen baita eta bigarrena Nafarroan.
Famili'On egonaldiak
- Apirilaren 5etik 11ra. Hobekuntza barnetegia, B1-B2 mailako helduentzat eta haien haurrentzat; Zuberoan eta Nafarroan.
- Apirilaren 13tik 18ra. Erdi mailako ikastaldia, A2-B1 mailako helduentzat eta haien haurrentzat; Lapurdin eta Nafarroan.
- Uztailaren 20tik 25era. Familia euskaldunentzako espedizio ibiltaria; Euskal Herri osoan.
Hirugarren egonaldia, berriz, udan iraganen da, uztailean. Bordagaraik azpimarratu du lehen bietarik arrunt desberdina izanen dela: «Sistema berarekin, astearen lehen partea Ipar Euskal Herrian pasatuko dugu, eta bigarren partea, Hego Euskal Herrian. Baina hor, aldiz, euskara eskolarik ez da izanen, familia euskaldunentzat pentsatua delako proiektua. Gure helburua izanen da astea osorik euskaraz pasatzea eta hizkuntza ohituren inguruan hausnarketak egitea helduen artean».
«Talde profesional eta kualifikatu batek» eginen die harrera familiei: egonaldietan, animatzaileak, irakasleak, soziolinguistak, psikologoak eta beste profesional anitz ibiliko dira hala helduei nola haurrei mintzatzen beren esperientzian eta jakitatean oinarrituz.
«Dimentsio humanoa zaintzeko asmoz» mugatu dute zenbat familiak eman dezaketen izena, eta, beraz, hogei onartuko dituzte, 3 eta 11 urte bitarteko haurrak dituztenak. Egonaldiaren prezioa 300 eta 965 euro artekoa izanen da aste bakoitzeko, formularen eta haur kopuruaren arabera. Zehaztu dute prezioak barne hartuko dituela hauek: bazkariak, garraioa, ostatua, jarduerak, ikastaroak, animazioak eta materiala. Egoeren arabera, laguntzekin ordaindu daiteke parte bat.
Euskal Herri osokoa
Funtsean, aldiro helburu desberdinekin, baina formula nahiko antzekoa izanen da egonaldi guztietan: «Goizean, gurasoentzako euskara ikastaroak —edo hausnarketa saioak— eta haurrentzako jolasak; arratsaldean, adin guztietarako jarduerak %100 euskaraz; gauean, animazio lasaigarriak familian».
Hizkuntza gaitasuna alde batera utzita, gainera, azpimarratu dute egonaldi horiek balio dutela «Euskal Herriko lurraldeak hizkuntza eta kultura euskaldunaren bitartez ezagutzeko». Eta jardunbiderako urte ezin hobea da 2026a, azpimarratu baitute aurten Ipar Euskal Herriko oporrak eta Hego Euskal Herriko Aste Santuak ber momentuan gertatuko direla. «Egutegien lerrokatze horrek euskararen lurralde osoko familien parte hartzea susta dezake».
Ebete euskararen erabileraren sustatzeko baliabide eta tresnen kooperatibaren izenean mintzatu da Maialen Abistegi Sanchez gaur goizeko prentsaurrekoan: «Asko hausnartu dugu proiektu honen inguruan, eta nazio ikuspegia azpimarratzekoa da. Euskal Herri mailan egiten da Ipar zein Hego Euskal Herriko familiak elkartzeko. Kolektibitatean eraikitakoa da». Dindaia fundazioko Ester Lakastak osatu dio adierazpena, iruditzen baitzaio familientzat ez ezik euskalgintzako eragileentzat ere interesa badutela egonaldiek: «Elkarlanean oinarritutako proiektua da, eta aukerak ere irekitzen ditu eragileen arteko aliantzak egiteko. Oso interesgarria da. Euskalgintzak, hain zuzen, nik uste hori behar duela: aukera gehiago eta sinergia gehiago».
