Foro Sozial Iraunkorraren lan baten arabera, 482 dira euskal gatazkan argitu edo ebatzi gabeko heriotzak kasuak. Hala esan du gaur Donostian Miramar jaurregian egindako prentsaurreko batean. Eusko Jaurlaritzaren, Coviteren, Euskal Memoriaren, Amnisty Internationalen edota ETAren biktimen beste elkarte batzuen azkerketak aztertu eta datuak gurutzatu ditu, eta horrela ondorioztatu du 482ko zifra. Jaurlaritzak dio 220 heriotza daudela argitu gabe, Covitek 359 eta Euskal Memoriak 123. Azterketa horietako kasu batzuk berdinak dira.
Foro Sozialak emandako datuek diote ETAk eragindako heriotzen %23,2 daudela argitzeke, BVErenak %24,29 eta GALenak %37.
"Konplexutasun handiko gai bat da", aitortu du Teresa Toda foroko kideak. "Beharrezkoa da biktima guztiei bermatzea egia, justizia eta erreparazioa". Fernando Armendariz, Agus Hernan eta Nekane Alzelai ere mintzatu dira agerraldian. "Sufrimendua izugarria da". Tortura kasuak ere aipatu dituzte, bide batez, eta gogoratu dute Jaurlaritzak 4.113 tortura salaketen berri eman zuela iaz.
Biktima askorekin egon direla esan dute, eta nabarmendu dute euren ustez haietako "gehien-gehienak mendeku eta errebantxa planteamenduetatik oso urruti" daudela. "Bizikidetza sozialaren alde daude, eta haien eskaera nagusia egia jakitea da, eta egiaren bidez erreparazio instituzionala eta soziala nahi dute”.
482 heriotz horien argipenak hiru arlori erantzun beharko lioke, Foro Sozialaren arabera: egia jakitea, biktima guztien berdintasuna eta denei aitortza bera; eta presorik gabeko bizikidetza eraikitzea. Horretarako, funtsezkotzat jo dute akordio bat lortzea instituzioen, gizarte zibilaren eta biktimen artean.
“Eztabaida lasai bati ekitea nahi dugu. Premiazkoa da hitzak ere desarmatzea”, esan du Hernanek.
