Udalen baliabiderik ezin dela erabili igandeko kontsultetan. Horixe ohartarazteko gutun bana igorri die Espainiako Gobernuaren ordezkariak galdeketa egitekoak diren 34 herrietako alkateei; "ez baliabide materialik eta ezta giza baliabiderik ere". Udalek neutral jokatu behar dutela esan die, gainera: "Alderdi batek independentzia bultzatu dezake, baina Administrazio Publikoak neutral jokatu behar du, Espainiako Konstituzioak esaten duen bezala, eta interes orokorrari jarraituz".
Alkateei esan die beren egitekoa dela "galketa horretatik abstenitzea".
Urkijoren oharrak ez du ezer aldatuko. Izan ere, galdeketak udalen parte hartzerik gabe antolatu dituzte, tokian tokiko elkarteek. Hautetsontziak ere ez dituzte udal eraikinetan jarriko; haien atarietan baizik.
Hain justu, Urkijoren ohartarazpena iritsi ostean, Gure Esku Dago-k bere protokoloaren bi puntu nabarmendu ditu: elkarte pribatuek antolatu dituztela galdeketak, erakunde publikoen esku hartzerik gabe; eta, beraz, galdeketek ez diotela hauteskunde araudiari jarraitu behar.
