"Gatazkari irtenbide demokratikoa" bilatu behar zaiola aldarrikatu dute manifestazio nazional erraldoian

Milaka eta milaka lagun bildu dira gaur Donostian pasa den astearteko polizia operazioa salatzeko, eta martxaren amaieran Ainhoa Etxaide LABeko idazkari nagusiak eta Adolfo Muñoz ELAko idazkari nagusiak "gatazkari irtenbide demokratikoa" bilatu behar zaiola aldarrikatu dute, ELA, LAB, ESK, EILAS, EHNE eta Hiru sindikatu deitzaileen izenean.

Jende uholdea izan da. Martxaren burua ibilbidearen amaierara -Bulebarrera- 18:10ean iritsi da eta bukaera Perla parean zen artean. Askatasunaren alde, eskubide guztiak guztiontzat leloa izan du ekimenak.

Sindikatu deitzaileek manifestazioaren balorazio "positiboa" egin dute eta gizarteak "erantzun paregabea" eman duela nabarmendu. Parte-hartze jendetsuarekin, "gizarteak blokeo egoera honetan subjektu pasibo izateko prest ez" dagoela argi utzi du, ELAko eta LABeko idazkari nagusiaren ustez. "Mota honetako ekimenak dira gizarteak eskatzen dituenak".

Horrez gain, inkomunikazio egoera eta komunikabide batzuen jarrera salatu dute Espainiako Alderdien Legea bertan behera uzteko ere eskatu dute, "injustua izateaz gain, aukera politiko eta sozial bat desagerrarazteko" asmoz egina delako. "Espainiako Estatuak berretsi egin du euskal gizarteari eskaintzen dion irtenbide bakarra gatazka luzatzea dela".

Atxilotu eta espetxeratuei elkartasuna adierazteaz gain, horiek berehala askatzeko eskatu dute.

Bulebarreko ekitaldiaren amaieran Internazionala eta Eusko Gudariak abestu dituzte. Txaloak izan dira ekitaldi horretan, baita ibilbide osoan zehar ere.

EAJk, ezker abertzaleak, Aralarrek, EAk, ABk, Hamaikabatek, Alternatibak eta beste eragile askok bat egin dute deialdiarekin. Ibilbidean atxilotuen aldeko oihuak, euskal preso eskubideen aldekoak eta independentziaren aldekoak entzun dira, baita "PSOE, GAL berdin da" ziotenak ere.

Hiriburura iristeko auto ilara luzeak izan dira. Lekukoen arabera, Gipuzkoan, Donostiako noranzkoan, A-8 autobidean Arroako ordainlekua baino lehen, Ertzaintzak kontrola jarri du eta Zarauzko ordainlekuaren ondoren ere bai Guardia Zibilak.

Patxi Lopezen kritikak

Patxi Lopez Eusko Jaurlaritzako lehendakariak gaurko manifestazioarekin "sistema demokratikoa zalantzan jarriko" dela adierazi du. Alfredo Perez Rubalcaba Espainiako Gobernuko Barne ministroak, berriz, "ETAren estrategia kalera atera" dutela nabarmendu du eta, beraz, "EAJk ETAren estrategia defendatuko" duela hala.

Joseba Egibar EAJren GBBko presidenteak Rubalcabari erantzun egin dio gaur manifestazioan parte hartzeak ez duela "ETArekin identifikatzen" direnik esan nahi, "ezta Arnaldo Otegiren pentsatzeko moduarekin, ezta gutxiago ere. Baina oinarrizko eskubideak hausten ari diren honetan, gu kalean gaude, eta politika egin nahi dutenei babesa ematen". Aralarrek "inoiz baino gehiago bide politikoen garaia" dela aldarrikatu du. EAk pozik azaldu da abertzaleak gaur bat egitean "gutxieneko akordio horretara" heldu direlako.