Hendaiakoa sortzez (Lapurdi), Parisen zegoen suhiltzaile, eta Biriatura (Lapurdi) itzulia zen oporretarako: larunbat goizean atzeman zuten 21 urteko gaztea etxe azpian, lurrean, konorterik gabe. Urgentziaz eraman zuten Baionako ospitalera, baina ez du bizirik iraun. Inkestaren lehen elementuen arabera, uste dute istripua izan dela.
Ikertu dutenez, besta egitera joana zen gaztea ostiral gauean eta neska lagunaren etxera itzultzekoa zen lotara, Biriatura; neska lagunaren aita eta amatxi ere baziren etxean. Larunbatean goizeko 06:00ak aldera, harrabotsa entzun zuen aitak: etxetik atera zen, baina ez zuen ezer ikusi. Hiru oren geroago, neska lagunaren amatxik atzeman zuen gaztearen gorpua. Dirudienez, balkoitik erori zen.
