Gazteen ezagutzak gora egin duelako pozik, Auzmendi

Eusko Jaurlaritzako Hizkuntza Politikarako sailburuorde Lourdes Auzmendi pozik agertu da, gero eta gazte elebidun gehiago daudelako; baina, aldi berean, onartu du hori ez dela islatu erabileran. «Hor dugu erronka», esan zuen inkesta aurkeztu zen egunean. Euskararen Erakunde Publikoko buru Frantxua Maitiaren ustez, Iparraldean duten xede nagusietako da euskararen erabilera handitzea administrazio publikoan, eremu formalean. Dena den, pozik zegoen, zenbaki absolututan euskaldun kopurua aurreko inkestan baino handiagoa delako. «Gainbehera eten dugu apur bat». Euskarabideko Julen Calvok, berriz, gazteen ezagutzaren igoerari erreparatu zion, Auzmendik egin zuen moduan.